我讀的書不多，讀的都是歌詞
2024.07.09
話說，小編讀書時，有書唔讀，日日返學就係抄歌詞✍🏻。粗略估計，本人抄歌詞嘅年資不少於七、八年，抄過嘅歌詞閒閒地都過百首，除咗感慨自己好燃燒青春之外，更加感嘆廣東歌歌詞嘅厲害🔥。尤其是最近幾年，歌詞嘅主題變得更加多元化，要乜有乜，以有限嘅文字寫出無限嘅可能性——
《某種老朋友》寫人與人之間，道不同不相為謀，老朋友喺人生路上分道揚鑣，無奈亦無可奈何。
《隔牆有耳》道盡一個人對感情嘅執著，故作掩起雙耳不聽不聞不痛楚，實不過係另一種隔牆有耳打聽窺探放不下，正正係「扮冇嘢先最有嘢」。
《念》寫出咗咩叫做對身邊人所承受痛苦之同理心。
《在最好的時間做最好的你》講人在低處，要不亢不卑，蓄勢待發。
《超英歌》叫人 "Buy Less Buy Better" ，教大家一齊做個環保又精明嘅消費者。
諸如種種，廣東歌歌詞之豐富，萬千世情無不入詞中❤️。
畢業多年，小編已經好耐冇抄歌詞啦，但係仍然日日聽廣東歌，依然為廣東歌歌詞所驚艷😍。嚟緊小編會不定期同大家分享吓有咩「好正嘅歌詞」。世情盡在歌詞中，總有一兩首啱你聽👂🏻。